|
Timilaw
Iyzwalen:
Agellid
Ajerfiw
Tawwert tamezwart
Agellid yused in
allun izver g amenkud nnes tameqrart tuddu, mnit
timurawin ghers d uragh, zuragh
Agellid:
ayed yall I netc yall sis (itvesv
s imesli yolu)
Agellid:
mammu ghres ….am netc mi dis nisi g
tadwyt ayed , netc , netc
( Seg
yebod ajtvitv, ajerfiw ini nnes
apenkul,ibed f ghil n agellid )
Ajerfiw:
agellid nnegh wuddu ,agellid nnegh matta ghef
assa.
Agellid:mi
ssnegh matta gherek seg takti..
Ajerfiw:
dis adrar maqrar emmalnes “adrar n
tanfust”,yetcur s tifan,adaghen d imghiyen…
Agellid:
mani yella adghar ayed, mani, mani …..
Ajerfiw:
maca g adrar din tbucilt tedder ghadi seg izri
tella ,nnej f ixf n adrar ,g takla tameckunt
Agellid:
tbucilt…. !!!
Agellid:
mak emmalnas ?
Agellid:
tanaonuct ….ghen tameqrart…
Ajerfiw:
tgujilt emmalnas agellid nnegh…..tameqrart.
Ajerfiw:tgujilt
s adrar n tanfust.
Teqqim tizi
tallest….imesli n bururu
G aghsru n
agellid ,yella des sennes ajerfiw agellid..
Ajerfiw:
matta temmited wuddu nnegh.
Agellid:
xsagh adrar dyn tura ,netc agellid wuddu amdal
yall sis I netc…netc ansi adrar.
Ajerfiw:
suggum arwihhi fellas..(yesbeddid awal nnes)
Agellid:
aha mi adsuggmagh netc wuddu ,agellid wumdal
yall sis ,mi suggum…ajerfiw
Ajerfiw:
way way mass inu ,maca matta yanig I tbucilt n
adrar teddin…(s imesli ammatvu )
Agellid:
tbucilt n adrar…mak emmalnas..(fus nnes f tmart
..temmita yettu )
Ajerfiw:
tgujilt tgujilt mass inu ( s imesli
azewwar etteg g iman nnes yessen )
Agellid:
way…way …essnagh .
Ajerfiw:
matta gherek seg takti mass-inu wuddu
Agellid:
adan nnes…..a telghes s tili
tallest tuden
ujenna rewlen itran…mani taziri
Ajerfiw:
aneghrrest d anigit g aclif degr g suff n
ixafuren ….atvu itirar gar asen ,s nir in nir
essefrah
Agellid:
ayyuz ayyuz …
Tazvzveft “
aaahhh…….”yygim lughed aguzlal ,tergha inarn
eqqsen tibbura…ajerfiw
F asemra agellid
tneddum ,armi yettves djujef s amenkude
tuddu g fus nnes
Agellid:
adrar inu….inu …inu …
ammatvu ,adbir
amellal zzat-tes yemmales “ adrar mi nek mi nek
ayed nnegh…”
Tawada zzat-tes
guda “ eddj adrar nnegh ,d tura ghen s tadewsi
…”
Agellid g
ajujef nnes tuttlay, tidi ahwan g udem nnes
,etcecef aneffis d azvelmatv
Agellid:
ajerfiw …ajerfiw..
Agellid:
ugur-s yahat …ugur
Izvwe
yelghes adbir …d s yeboad imesli . yemmal
tilelli ….tilelli ,yekker agellid…..tagda g udem
nnes
Agellid:
mani tellid ajerfiw …ajerfiw ( yuwat s urrif
)
Agellid:
agellid wuddu mi tagged …mi tagged ( g ul nnes
skerkes )
Ajerfiw mak
yutef itazzel …
Ajerfiw:
surf iyyed agellid inu mass inu matta dis ?
Agellid:
jujfagh s targit …adbir ibed zzati (yesbeddid )
Ajerfiw:
adbir…
Agellid:
way adbir, adbir amellal yuwa adrar
nnegh….(yesbeddid tikkelt nidven ajerfiw )
Ajerfiw:
surf iyyed tikkelt nidven ayed sin targit..
Ajerfiw:
yadeqqimagh des sennek itva.
Ajerfiw:
tnejjmed attsved imira d mi temmitedc f targit
ayed
Agellid:
temmaled sahat..
Agellid:
maca…
Ajerfiw:
enber ixf nek g tsumta d ettesv..ettesv ayettca
ass atrar..
Yeqqim tizi
usya…imesli n bururu
Iyzwalen:
Tgujilt
Afsel
Tafra
G taferga
tazizawt tameqrart d atvu usyat tpuskit,tbucilt
toizzebt des sen tanut tawrast,tetvni g aman
,ttcar g tbuqqalt nnes.
Tgujilt:
a yemma ittvij tannemirt f tfuyt ennem ….ayemma
akal tannemirt f tifan ennem.
F aghraw n adagh
aciciw..anonuc
Tgujilt:
ayya dapat..qim des inu
Tgujilt:
inig tinigt…seslanagh.
Ifar aciciw d
ibed des sen tgujilt
Tgujilt:
matta gherek atrar..assa…teffuded..
Tisi akud
tiwetcu..tekker tgujilt tugur in takla, f
taghrutv nnes tbuqqalt,aman tsetta seg
tbuqqalt,acku terjij n tagura..zzat f ixf n
ighellayen..ghadi
Tgujilt:
ayekkuc n tadwyt
Tenber tbuqqalt
des sen tibuqqalin itven
Tgujilt:
matta ghessagh..(temmit…)
Tgujilt:
mani tlaba …mani tella.(turi kamur aqebul,addu
iqebbac tufit..)
Des sen aghemba…
Tgujilt:
mi dis isgharen des sen aghemba
Tgujilt:
yadefghagh tura adawigh isgharen seg
taferga..(tiretv tgujilt tlab nnes d teffegh..)
Tazemmurt , ayed
tadaght tuddut …azamal n umezruy , tilleli,
tmazight, g allagh n tazemmurt tisi afsel d f
aghraw tafra .
Tafra itven
tutva tettsv f ijdi, deffer tawala teqqim afsel
didin …..
Tafra:
arwas …..tafra nidven tugur , taseflat I tsisawt
abnayak, iknun I zeglu…eddjen ….
Afsel s allagh
tnaba ….
Afsel:
tafra ….tafra weltma …setma ,esslet
….tabratv inu….isvsvadv atvtvan, tusna
azerag….tanfusit …tanfusit …tmllawt ayekkuc….
tadvarwt tigrest
guda imseli n wari-itirar anffis d
uzvelmatv…..
ttcecef
aghraw….tafra tsawal…afsel din telghes..
Tafra:
ayetca mazvuzv atrar ad yulul …s iles nnes
ayemmel azul …..
Tafra:
tisi asulf taneggarut ,maca turel azegrar…tffaw
tfuyt ,ekkert a setma
G allagh ibraxen
tizvetvtvafin ,mak merden…merden swerrihi…
Tisi s ussan n
tafsuyt………
asswggass……am
marra asswggass , maca asswggass ayed ,amendi
yeqqur , adaghan eqqimen iqecqac tezdiden,
mani aman ,mani ibllem
anzvar …anzvar
Tgujilt:
akkuc uciyyed tazidirt, lemmi atemda tazghent
ayed .
Ametvtva tahwa s
tvitv nnes asetta deffer asetta , in lemmi saha…
Tgujilt:
akkuc ayen ….yessen
….Ifassen
texwitten in ennj ….nnej , mi tbed s tittret ,
is dis asirem ghen tawezghi ,
tzvallit deffer
tzvallit ,armi….talji
Iyzwalen:
Agellid
Ajerfiw
Tgujilt
Tazvzveft g
ammesv n ghasru ,imnayen f igmaren nnsen,agellid
isuggur f ajerfiw.
Agellid:
ghassagh takrut iburer tura.( ajerfiw dis sen
agellid)
Ajerfiw:
inkedv agellid merrad in adrar tanfust
imira..(..isawal in takrut )
Agellid:
effertvtv yall cra zzat wen,adagh ghen ibrax..
Ajerfiw:
tgujilt adan nnes immat ..
Agellid:
egretted …egretted, deffer atvtvfmt.eddj uccnawn
adetcent..( itvesv s imesli anjuf)
Gar taferga addu
tfuyt n aggur
Agellid:
lemmi anawetv ajerfiw, abrid dazegrar guda
lemmi…
Ajerfiw:
welyuc arwihi ..ouddi anawetv.
Mi yebod guda
zzat takla tameqrart nnej f adrar ,beden yapwa..
Agellid:
ayed netta adrar…ajerfiw
Ajerfiw tferfer
nnej ithkker ..dapat…dapat…g adghar
Ajerfiw:
agellid inu yall amna dasvbih g tizi, bururu f
aghraw n tazemmurt ,tvitvtvawin terreq….jaj g
takla tella..
Ajerfiw:
mammu jaj ,ayeffegh tura adghar yemmennetv s
takrut…
Teffegh tgujilt
d tmezneqqt f iri zin yemmigel tbed , ixf nnej,
fus g fus.izvwa ifar bururu ,ighrawen tcecef
neffis d azvelmatv…atvu itwdsi.usman yutef g
iblem ansi yewwetv tamurt d imesli n idjag..
Tgujilt:
tmllawt ayekkuc….tcek wuddu..
Agellid:
ettvfet, aqqent s asekraf aserdas.(s imesli yolu
)
Idjen s
iserdasen g fus nnes asekraf,tazzal netta d sen
itven, d tgujilt welyuc tbed timayt…ajerfiw f
aghraw n tazemmurt izver
Ajerfiw:
ettveft …tazzla ….seld aterwel tura …tazzla
…aserdas
Welyuc tbed
…tigi a teddj adghar ….tissuf immat …d mi ateknu
in azeglu ettvfent ifasn nnes s asekraf …
tughult takfltn n amezruy….
Izvwa …anzvar s
ujenna…ehwan . s tawdsi ansi isafan ekkren
….amzir g yall tizi d annar ,
s adrar .
Agellid:
mani tellid ajerfiw ….mani agmar inu.
G ammasv n
anzvar ….weldinc izvzvray, igmaren rewllen
…ugden s imsli n idjag yekker suf abarkan.
Ajerfiw:
tallat…tallat….tallat…. Aaagg ….aaa…
Atvu yexwit
…yemda
Agellid:
mani abrid …mani
elligh….aserdas…..ajerfiw…..mani tellim
mi yessen abrid
….s yabod yezvzvra tgujilt….
Agellid:
tgujilt…ayya taliltiyyed (yeggur
deffer mi yessen iman nnes )
Tgujilt:
mantten tcek …..ugur tcek d azeglu eddj
adrar …
Agellid:
netcin ayetmaten …..eddjanagh anettu izri
d anezvzver tura d anar asebtar tatrart tgujilt
….tgujilt.
Tgujit:
tiririt …..idenn tcek.
Agellid:
aha….aha …(yexwa fus nnes )
Yerni yegur
deffer ansi yezpeqq d yutva g suf
aberkan….yexwit aman.
Tguijlt:
tilelli nemmek tinettit …
Tughult tizi
tallest
yudnen asedan
Yuritt
emmis n nefusa
Yefren –adrar nefusa
e-mail: tilawt@yahoo.com
|
